Portà da na barca lidiera par mar scuri e fondi,
Attis al riva de corsa, smanioso te l bosc
de la Frigia, te i pra de la Dea che l bosc tut atorno
incorona de onbria; là, fòra de lu, spirità
co na scàia de pièra al se ràga(1) via nèti i afari picadi.
E quan che l à vist che là in mèdo no l era pi mas-cio,
e le mace de l sangue soo fresco par tèra, esaltada
la vea par la man color late n tamburo, quel pizhol
che i sona, Dea Madre Cibèle, co i fà le to sacre funzhion,
e batendo co i so dedin bei la pèl vòda de toro,
tra grìsui e tremazh cusì la cantea a le compagne:
“Su, Galle, vegnè co mi insieme, te i bosc de Cibele pi fisi,
su, fede remenghe de nostra Signora del Dindimo,
che, come in esilio, ndé in zherca de tère foreste,
che driome vé fat la me strada, e i perìcui, sorelle,
la furia de l mar vé frontà e l vostro corpo de mas-ci
da n odio perpetuo par Venere vé rovinà,
su, svelte, saltè, feghe festa a la nostra Parona.
Leveghe la fiaca a i pensieri, vigneme drio tute
a l santuario de Frigia, te i bosc de la frigia Cibele;
là i cinbali i sona, i sacri tamburi i rinbonba,
la cana domada de i Frigi la manda na musica scura,
le Mènadi l’èrola in testa le sgorla da osèse,
le canta, le zhiga, le dis su razhion sbaregando,
là come farfalle va atorno l corteo de Cibele,
e corér fin là val la pena, tra bai scalmanadi”.
Fenì de cantar sta novena Attis, né mas-cio né fémena,
eco, la so compagnia co vozhe che trema la ciapa
sù un zhigo, i tamburi lidieri i taca a mular,
i cinbali i introna, e i verdi coston su par l Ida
insieme le fronta de corsa le Galle. Furiosa, sfinìda,
co l’anda che segna l tamburo, Attis la va co l fià longo
par bosc fisi e scuri, rabiosa vedela che scampa da l dof;
pa tégner al pas infogà de la capa cor via nca le Galle.
Le è pena rivade, sfinide, nte l bosc da Cibele
e, a stòmego vòdo, ghe vien na gran sòn da masa fadighe:
le è là a pisocar, se sèra i ocet lori soi,
e basta un sonet a calmarghe la furia te l cuor.
Ma quando che i ragi, che i òci del sol che ne indora
al cèlo i sciarise e la tèra de sas e l salvarègo mar,
e scanpa la nòt scaturida da i zhòcui de i freschi cavai,
Attis l è bel desmisià, al Dio de la sòn al cor via
e incòntreghe riva, e la sfiada, Pasìtea, la sposa.
Cusì bel riposà, senza pi quela furia rabiosa,
Attis al proa ricordarse tut quel che l à fat, in che posti
che l’è capità e quel che l’ha pèrs al capise pulito,
e da novo, te l cuor na bufera, al va do su la spiaja. 47
Là l varda tra le àgreme l mar infinito, a la patria,
co vozhe ingropada da far compasion, al ghe dis:
“O patria mea, madre di vita, patria mea genitrice,
asada par desperazhion, cusì come i servi par solito
i ghe scampa a i paroni, e tut par rivar inte i bosc
de l Ida, co n metro de neve, tra tane ingelade de bestie,
e fòra de mi ndar a sconderme là te quei bus,
da che banda etu mai, onde mai, patria, pòse pensarte?
I ocet i te smira, i va in zherca de ti lori soi,
adès che o un fià libero l cuor da la rabia furiosa.
E lora, distante da casa, vario da ndar par i bosc?
No ver pi na patria, la roba, né amighi, né mare né pare?
Lontan da palestra e ginasi, da l stadio, da piazhe e marcà?
Ah cuor, pore cuor, chisà quant che te tocarà piànder!
Che aspetto o figura elo ncora che mi no apiè vu?
Mi fémena, dòven, fiolet, tosatèl, e mi fior
del ginnasio, mi gloria, mi onor de palestre; par mi
tut un vèrder le porte, par mi sempre caldi i scalin,
de corone de fior par mi vee la casa inbelida
de prima matina ogni dì, co tochea levar su.
E adès, che son ndata a servir i Dei e Cibele dirali?
Mi Mènade, senzha na part de mi steso, mi sterilo
me tòchelo star qua su l Ida, te i prà sote un metro
de neve, mi far la me vita qua a i piè de ste zhime de Frigia,
divider al bosc co le cerve o i cinghiai ch’i é de casa?
Adès sì che me jol quel che ò fat, che me ciame pentida!”
La ghe era sbrinsada la vozhe da i bei lavri rosa,
portandoghe a i Dèi che i scoltea la notizia improvvisa;
subito lora Cibele la sliga da l dof un leon,
teror de le fede, cusì la ghe parla e lo indèrega:
“Va, bestia, va senza pietà, fa che l olte via mat,
che i tiri da osèso i lo pare da novo inte l bosc,
lu che l varie tant a caro da no ubidir pi a i me comandi.
Su, mena la coda, su, segna i galon de scuriade, e soporta;
fà in modo che treme nca l’aria a sentirte rognar
e sgorla cativo la rosa criniera su l col cusì forte”.
Cusì la minacia Cibale, e l dof la ghe sliga ela sola;
la bestia, tant pi inderegada, co l cuor infogà da la rabia
la parte, la rogna, le zhate le crèpa le frasche.
E quan che la riva a la sabia sbiancada de l’umida spiaja
e l tenero Attis la vet là su l marmo de l mar,
adòs la ghe salta; lu, scaturì, in medo a i bosc
salvàreghi l scanpa e là l fa la serva, par tuta la vita.
Dea granda, Cibèle, Signora del Dìndimo, tegni
lontàn la to furia, parona, da mi e la me casa;
ti spireghe a i altri sti tiri, a i altri sta rabia.
